As actividades das Letras Galegas organizadas dende os servizos de Lingua e Memoria da Deputación de Pontevedra chegarán este mes de xullo a seis concellos da comarca de Caldas para dar a coñecer a vida e obra de Florencio Delgado Gurriarán. O espectáculo ‘De Valdeorras a México. Terra A Nosa’, representando por ‘Polo Correo do Vento’, estará este venres día 1 de xullo en Cuntis (21h-Praza das Árbores), o 2 en Pontecesures (11h-Plazuela), o 7 en Caldas, o 12 en Portas, o 14 en Catoira, e o 21 en Moraña (12h-Multiusos).

Trátase dun espectáculo familiar para divulgar a biografía do poeta valdeorrés Florencio Delgado Gurriarán (1903-1987), homenaxeado pola Real Academia  Galega (RAG) co  Día das Letras  Galegas 2022. Na presentación das actividades a deputada de Lingua e Memoria María Ortega asegurou que o autor é unha das voces máis senlleiras da literatura do exilio polo que nas actividades de realce da súa figura organizadas dende o organismo provincial era precisa unha programación que tivera como protagonismo á cativada.

Na actividade alternarase a narración da biografía de Delgado Gurriarán, coa creación dunha ilustración  e a interpretación de distintas pezas musicais. Contará ademais con tradución en lingua de signos, para que sexa accesible a todas as crianzas, e rematará cun pequeno coloquio adaptado ás súas idades e un obradoiro no que cada participante realice a súa propia caricatura  do autor.

Ademais das obras sobre Florencio Delgado Gurriarán, e co ánimo de celebrar as Letras Galegas non só durante o mes de maio, a Deputación tamén achegará ás bibliotecas municipais e aos centros de ensino pequenas biografías destinadas á cativada. Para o alumnado de Primaria o servizo Editorial da Deputación editou a peza ‘Levar paisaxes nos ollos’ e para a xente moza editou unha banda deseñada coordinada por Kiko da Silva, con guión de Fernando Llor e ilustracións do alumnado de ‘O Garaxe Hermético’. Cadansúa das publicacións tivo unha tiraxe de 1.000 exemplares.