As xornadas “Alzheimer de preto”, organizadas pola Federación Atlántica de Asociacións de Familias de Persoas con Alzhéimer e outras demencias (FADEAL) e a Deputación de Pontevedra, continúan o seu percorrido pola provincia e chegarán esta semana a catro novos concellos: Mondariz-Balneario, Mos, Forcarei e Lalín. A través desta iniciativa, para a que a institución provincial achega 15.000 euros, organizaranse sesión formativas sobre esta enfermidade nos 61 concellos da provincia.

En concreto, este martes 10 de decembro o  proxecto chega a Mondariz-Balneario, de 17:00 a 19:00 horas na Sala de Cultura da Casa Consistorial, onde terá lugar unha segunda xornada ao día seguinte, 11 de decembro, á mesma hora. Tamén en Mos a xornada se dividirá en dous días, entre o mércores 11 e o xoves 12 de decembro, de 17:00 a 19:00 horas, na Casa Rectoral de Petelos. As citas continuarán o xoves 12 de decembro con Forcarei, de 10:00 a 14:00 horas no Salón de actos do Centro Social; e en Lalín, de 16:00 a 20:00 horas no Edificio Polivalente Manuel Rivero.

O obxectivo destas xornadas é que familias coidadoras, persoas diagnosticadas e a poboación en xeral coñezan de preto a enfermidade, a súa evolución ou as pautas para facilitar o día a día dos doentes, isto é, información, asesoramento e orientación a todas as persoas interesadas de todos os recunchos da provincia, atendendo especificamente as persoas que residen no rural. Concretamente, abordaranse os primeiros pasos tralo diagnóstico desta ou outras enfermidades neurodexenerativas, darase orientación sobre recursos asistenciais e sanitarios, tratamentos farmacolóxicos e non farmacolóxicos, así como facilitaranse novidades en canto a investigación, pautas para o manexo no fogar ou fóra del, ou tramitación documental e asesoramento legal.

O proxecto financiado pola Deputación está a ser xestionado a través das entidades asociadas da federación, que serán as encargadas de realizar as sesións informativas ao longo da provincia: a Asociación de Familiares de Enfermos de Alzhéimer e outras demencias de Pontevedra (AFAPO), a Asociación de Familiares de Persoas con Alzhéimer e outras demencias da Comarca do Morrazo (AFAMO), a Asociación de Familiares de Enfermos de Alzhéimer e outras Demencias de Galicia (AFAGA) e a Asociación de Familiares de Enfermos con Alzhéimer (AFASAL).