As actividades de promoción do sector audiovisual revisten un especial interese tanto polo seu obxecto coma pola súa repercusión mediática nos medios de comunicación, debido a que a proxección de produtos audiovisuais implica unha programación de difusión en diferentes medios, televisión, cines ou festivais, que pode acadar, en certos casos e segundo o éxito do filme, proxección internacional, polo que é un medio especialmente idóneo para publicitar a provincia, de aí a importancia de apoiar economicamente estes eventos.

Asociar a imaxe da Deputación a este tipo de actividades levadas a cabo principalmente en escenarios localizados na provincia, que conta con numerosos recursos naturais e patrimoniais, impulsan o desenvolvemento económico e social do noso territorio, polo que encaixan cos obxectivos de promoción cultural e turística desta institución e supoñen importantes vantaxes de difusión en diferentes medios cun grande impacto global. Isto xustifica o interese do citado organismo no patrocinio de actividades coma estas na provincia de Pontevedra, a cal ofrece un escaparate único de promoción turística, social, económica e cultural.

Co fin de cumprir os obxectivos descritos, esta convocatoria revelouse, desde a súa primeira edición no 2021, un instrumento útil para o auxe do audiovisual galego rodado na nosa provincia; proba disto é a produción de 23 longametraxes e curtametraxes aquí rodadas e que contaron coa colaboración da Deputación.

• Condicións xerais para a realización de contratos de patrocinios con entidades privadas (BOPPO 17/07/2024)
• Tramitación en sede.depo.gal