A Deputación de Pontevedra organiza esta semana cinco novos obradoiros de capacitación tecnolóxica ao abeiro da Rede SmartPeme+. As accións celebraranse entre este luns 17 e o venres 21 de marzo e afondarán en cuestións de grande interese para o tecido empresarial da provincia como a ciberseguridade, o rexistro de persoas viaxeiras, WhatsaApp Business, SEO para redes sociais ou a cultura sostible e a responsabilidade social. Todas as accións requiren inscrición previa e impartiranse de maneira telemática.

O luns 17 ás 11:00 horas continúan os obradoiros sobre ciberseguridade, neste caso centrado no phishing (inscricións neste formulario). Impartido por Manuel Tornos,  asesor do Centro Provincial de Economía Dixital de Barro, o obxectivo e dar a coñecer esta forma de ciberataque, unha das máis sinxelas que existen e, ao mesmo tempo, a máis perigosa e efectiva. No obradoiro darse a coñecer esta técnica e as distintas formas nas que se pode presentar para poder identificala con eficacia.

O martes 18 ás 12:00 horas terá lugar un obradoiro sobre o novo parte de persoas viaxeiras a través do portal SES.Hospedaxes. Neste obradoiro, que imparte Patricia Cabaleiro, posgraduada en Turismo, explorarase a nova normativa, os seus cambios e os seus desenvolvementos no rexistro. As inscricións poden realizarse a través do seguinte formulario.

Xa o mércores 19, ás 11:00 horas, terá lugar un obradoiro para dar a coñecer a ferramenta WhatsApp Business (inscricións neste formulario),a versión orientada a empresas da popular aplicación de mensaxería. Con esta app móbil, as empresas e negocios poden relacionarse cos seus clientes dunha forma sinxela e profesional, xa que incorpora novas funcionalidades para organizar, automatizar e responder rapidamente as mensaxes. O obradoiro será impartido por José Luis Taboada, asesor da Oficina Acelerapyme Rural de Cambados.

O xoves 20 ás 12:00 horas María Aller, licenciada en Publicidade e Relacións Públicas, impartirá un obradoiro centrado no SEO para redes sociais (inscricións neste formulario). Nesta acción formativa abordarase como as redes sociais poden axudar a mellorar o posicionamento SEO das páxinas web e daranse a coñecer cales son as mellores ou, entre outras cuestións, o tipo de contido a crear para mellorar o SEO.

Por último, o venres 21 ás 12:00 horas celebrarase a segunda parte da formación sobre impulso da cultura sostible e a responsabilidade social (inscricións neste formulario), na que se coñecerán os 17 Obxectivos de Desenvolvemento Sostible e veranse exemplos prácticos que cada pequeno negocio pode accionar para afrontalos. A segunda parte deste obradoiro abordará ferramentas que os negocios poden poñer en marcha para auditar, entender prioridades e facer un xiro máis sostible dos seus procesos. O obradoiro será impartido por Sabela Álvarez, asesora de emprendemento, licenciada en Comunicación e formadora acreditada.

A Deputación destina este ano 1,45 millóns de euros á Rede SmartPeme+ e Acelera Pyme Rural para asesorar persoas emprendedoras desde as oficinas de Barro, Cambados, Lalín, Ponteareas, Pontevedra, O Porriño e Vigo. Desde esta rede lévanse a cabo actividades formativas relacionadas co crecemento empresarial e a transformación dixital, asesorando a ata 2500 emprendedores, autónomos e pemes ao ano e impartindo arredor de 200 talleres formativos e actividades complementarias.