A Deputación de Pontevedra financia a través do programa “+Música” a actuación musical de Pelepau que se celebrará este domingo 11 de agosto a partir das 23:30 horas na Rúa Praza Maior do Concello da Cañiza. Con esta iniciativa, a institución provincial pon á disposición dos concellos de menos de 50.000 habitantes un catálogo de artistas galegos e en galego co obxectivo de fomentar a nosa cultura e a nosa lingua, así como impulsar a reputación da provincia de Pontevedra como un destino cultural de primeiro nivel.

Pelepau é unha formación nacida no ano 2010 co fin de adaptar temas de tradición galega para percusións e voces. Está composta por 11 percusionistas, todos eles mestres en escolas e agrupacións de música e danza tradicional galega de recoñecida traxectoria. Os instrumentos de percusión empregados polo grupo nos seus concertos son, na súa gran maioría, tradicionais, destacando os que antigamente eran utensilios do día a día como culleres, tixolas, botellas de anís ou morteiros. Teñen dous discos publicados, ‘Fío e Agulla’ e ‘Na beira’. O grupo levará á Cañiza o espectáculo “Pelepau Sinfónico”, no que mesturará a música clásica coa música tradicional galega.

O concerto de Pelepau é unha das 59 actuacións que se están a celebrar entre maio e setembro nos 59 concellos de menos de 50.000 habitantes da provincia no marco deste programa provincial: 5 en maio, 2 en xuño, 20 en xullo, 26 en agosto e 6 en setembro. “+Música” ten un orzamento de 600.000 euros, cos que a Deputación aboa os custos de caché dos espectáculos.