A Deputación de Pontevedra acaba de publicar as bases da segunda edición do circuíto +Escénicas, co que a institución provincial apoia que os concellos de menos de 20.000 habitantes da provincia poidan programar espectáculos de danza e de teatro. Esta segunda edición, que conta co aval dos propios concellos que o valoraron cunha puntuación de 9,5 sobre 10, ten un orzamento de 195.000 euros, un 10% superior ao pasado ano, e supón un importante revulsivo para as compañías e artistas de artes escénicas tanto da provincia como do conxunto de Galicia.

Os concellos beneficiarios recibirán ata 3.800 euros para sufragar os espectáculos en réxime de cofinanciamento, desde o 90% para os concellos de menos de 5.000 habitantes ata o 70% para os de entre 10.000 e 20.000 veciños. Poderán seleccionar ata cinco espectáculos, e como novidade, no caso de solicitar entre catro e cinco obrigatoriamente un deles deberá de ser de danza. Os espectáculos, todos eles en lingua galega, deberán celebrarse entre o 1 de abril de 2025 e o 31 de marzo de 2026.

Na primeira convocatoria de +Escénicas realizáronse máis de 300 espectáculos en 49 concellos da provincia. As compañías e artistas teñen aberto o prazo para sumarse ou modificar datos no catálogo do circuíto, dispoñible no sitio web da Deputación de Pontevedra e cuxo prazo de adhesión permanece operativo ata o 28 de febreiro. Pola súa banda os concellos poderán solicitar os espectáculos de artes escénicas entre o 17 e o 31 de marzo.