A Deputación acaba de abrir o prazo para inscribirse ao obradoiro do Museo de Pontevedra  ‘Un mapa é unha ponte. Experiencia de creación con JJ Richards’. Trátase dunha actividade de creación dirixida a público adulto e novo, sen necesidade de experiencia previa. Celebrarase o sábado 23 de novembro, de 12:00 a 13:30 h, no Edificio Castelao. A inscrición realízase por correo electrónico a reservas.museo@depo.gal. Hai 12 prazas dispoñibles.

Este obradoiro de creación ten como obxectivo experimentar coa creación dun mapa a partir de fragmentos da novela Pensar para atrás, da artista JJ Richards (Tres Hermanas Libros, 2023). A propia autora dirixe esta actividade, na que propón considerar a obra como un xerme de significación aberto á experimentación, que xere novas experiencias posibles nas e nos visitantes. Convídase ás persoas participantes a percorrer o espazo e a colaborar na creación dun mapa real ou simbólico, acompañadas pola autora.

A experiencia pretende explorar narrativas dixitais, xerar diálogos e favorecer a reflexión en grupo. O obxectivo é explorar o poder terapéutico da escritura e a expresión artística, facilitar a expresión e integración emocional das vivencias persoais e promover o benestar integral e a saúde emocional a través da arte e a creatividade.

JJ Richards naceu en Bos Aires, vive en Madrid e pasa longas tempadas en Galicia. É artista, deseñadora, ilustradora e arteterapeuta. Formouse en The Art Students League de Nova York, Contemporary Art Academy de Londres e na Escuela Argentina de Arteterapia de Boos Aires. Actualmente participa en diversos programas do Centre of Applied Jungian Studies e está complementando a súa formación en historia da arte na Art Explora Academy pola Sorbonne Université de París.

Galerias de imaxes