A Deputación de Pontevedra apoia este ano o Entroido de Cobres, en Vilaboa, cunha subvención nominativa de 4.000 euros. Así llo trasladou o deputado de Cultura, Jorge Cubela, á presidenta da Asociación Cultural Cobres, Lidia Peleteiro, nun encontro onde o responsable provincial reafirmou o compromiso da institución provincial con esta Festa de Interese Turístico de Galicia que se celebra desde hoxe, 1 de marzo, ata o próximo martes 4.

A Deputación de Pontevedra apoia deste xeito unha das principais citas no calendario anual da provincia de Pontevedra, na súa liña de potenciar o rico patrimonio cultural e inmaterial así como as tradicións das Rías Baixas. A programación deste ano contará co percorrido polos barrios, de sábado a luns entre as 10:00 e as 19:00 horas (poderase seguir en tempo real a través de WhatsApp), hora á que a comitiva chegará aproximadamente á carpa. Alí, haberá festa a partir das 22:00 horas (ás 21:30 horas no caso do luns) con concertos e orquestras. O Entroido de Cobres rematará coa tradicional Corrida do Galo, que se celebrará o martes ás 16:30 horas. Ese día as madamas e os galáns farán o percorrido só pola mañá, de 10:00 a 13:00 horas.

O Entroido de Cobres é un festexo tradicional que se celebra cada ano nas parroquias de Santo Adrián e Santa Cristina de Cobres. O seu valor reside tanto na súa antigüidade (malia que se descoñece con exactitude a súa cronoloxía) como na súa continuidade a través do tempo, así como por ser o único entroido tradicional en toda Galicia cuxas personaxes principais non levan ningún tipo de máscara. Estas, madamas e galáns, percorren as parroquias de Vilaboa coa cara descuberta lucindo a beleza e a ostentación dos seus sombreiros e os seus traxes, que poden chegar ata os catro (os deles) e os seis quilos (os delas).