A exposición "Fotografía orixinal. Premios Provinciais á Xuventude 2017-2023" é unha actividade que forma parte do I Encontro Literario e Artístico: Pontevedra Literaria. Xuventude e Artes, o cal terá lugar os días 17 e 18 de outubro de 2024 no Museo de Pontevedra. Esta mostra recolle os traballos premiados nas categorías de fotografía orixinal e serie fotográfica dos Premios Provinciais á Xuventude dos últimos sete anos. A mirada destas mozas e mozos da provincia retrata a realidade na que viven: as viaxes de Erasmus, a convivencia de culturas, as escenas de rúa, as contornas urbana e rural, o valor da tradición e as posibilidades da modernidade. Un tempo que é o mesmo e unha trintena de experiencias de diferenza que recrean un completo paseo no que, en calquera caso, se demostra que na provincia existe un gran talento e futuro tras a cámara.