null

Emaús Fundación Social

Emaús Fundación Social

O grupo Emaús Fundación Social céntrase en defender e acompañar as persoas máis desfavorecidas da sociedade desde Galicia e o País Vasco. Actúa co obxectivo de promover e acompañar procesos transformadores, individuais ou colectivos, no ámbito social, económico e ambiental.

  • Persoas destinatarias
  • Persoas en situación ou risco de exclusión social. Persoas que necesitan recuperar hábitos, desenvolver competencias e relacións sociais, e mellorar a autoestima.

A cidadanía viguesa. Veciñas e veciños do barrio e da cidade olívica que queiran participar nos obradoiros e nas actividades realizadas, que tamén poden sentir soidade ou illamento relacional aínda que non se atopen nunha situación de exclusión social. Persoas que desexen colaborar, participar, comprometerse socialmente e compartir o seu tempo e talento no desenvolvemento de actividades.

Actuacións

Compromiso coas persoas máis excluídas da sociedade. Esta entidade aposta por acompañar dunha maneira moi próxima e flexible as persoas que se atopan en situación de exclusión social. Para isto, ofrece unha relación profesional de axuda centrada en recoñecer as necesidades diferenciadas de mulleres e homes, en fomentar o exercicio dos seus dereitos e en mellorar a súa calidade de vida, sempre desde a consideración e o respecto do proxecto vital de cada persoa. Entre os seus proxectos e programas atópanse:

  • “Entre fogóns”. Obradoiro de cociña que aposta por promover o autocoidado.
  • “Tesela”. Programa centrado en fomentar a capacitación de competencias relacionadas co traballo.
  • “RoL”. Proxecto dirixido a persoas en situación de exclusión severa.
  • “Tira do fío”. Programa de acompañamento social personalizado, flexible e adaptado ás necesidades de cada persoa.
  • “Fogares”. Programa de inclusión a través da vivenda baixo o enfoque de housing led.

Xeración de recursos onde outros ven residuos ou lixo. Emaús Fundación Social defende e pon en práctica un modelo produtivo vinculado á economía circular a través da reparación e da reutilización, coma, por exemplo, co proxecto “maSmadera”, o cal consiste en obradoiros de accións de capacitación técnico-profesional relacionados coa recuperación e coa transformación da madeira.

Sensibilización para a transformación dun modelo de sociedade. Esta entidade traballa pola xustiza social e polo desenvolvemento sostible, e organiza obradoiros, iniciativas e proxectos de sensibilización e educación transformadora nos que, a través da comunicación e da innovación, se lles dá visibilidade ás causas que xeran desigualdade e pobreza. Emaús Fundación Social trata de aumentar a súa capacidade de transformación social ao poñer en valor conceptos relacionados coa sostibilidade social e ambiental, coa economía solidaria e circular ou co consumo responsable, entre outros. Nesta liña, cómpre destacar “PARTICIPA”, un programa para favorecer a xeración de vínculos afectivos a través do fomento de actividades en clave comunitaria, executado en colaboración coa asociación Provivienda.

Datos de contacto

Rúa da Ronda de Don Bosco, 9, baixo interior, 36202 Vigo

Volver
Imprimir ECS -Emaus Fundacion Social