Proxecto expositivo
LOVE
de David Fidalgo
Do 18 de xaneiro ao 1 de marzo de 2024
Sala Maruja Mallo, sede da Deputación en Vigo
David Fidalgo leva anos producindo obras de animación que falan da sociedade que mostran a televisión e as redes, desde un punto crítico e irónico a través do concepto do meme e do absurdo.
En “Love” establece unha reflexión sobre o clixé do amor verdadeiro na televisión.
Fálase dos realities como sinónimo de telerrealidade dunha maneira completamente incorrecta e consciente do engano.
Neste tipo de programas non se busca falar de persoas reais, son ficcións baseadas na superficialidade que non reproducen códigos da realidade, senón da televisión e das redes para formar un circo sustentado na inxenuidade da xente. É curioso este interese no amor romántico cando o que se favorece é o seu fracaso; o drama, os conflitos, os berros, os celos etc., iso é o que triunfa e engancha á audiencia, o cal convida a unha reflexión sobre a complicidade das e dos espectadores.
É tanta a repetición destes programas que é difícil que as e os espectadores discirnan entre o real e o irreal, damos por veraz unha fantasía prefabricada; non sabemos que é o amor, senón que coñecemos o que nos venden e crémolo noso. Normalízase o abuso e edulcórase a relación tóxica, o que pode provocar impresións negativas e fomentar devanditos comportamentos nas e nos televidentes, xa que a pantalla xoga un papel lexitimador moi perigoso.
En definitiva, falamos dun simulacro do amor romántico, dunha sorte de hiperrealidade baseada no estereotipo e fundamentada no capitalismo do cuqui.
David Fidalgo convida ás e aos asistentes a presenciar esta telerrealidade a través do retrato absurdo das e dos personaxes que a habitan e que, dunha maneira humorística, esconden unha imaxe da sociedade que resulta verdadeiramente perturbadora.
É isto amor?
PROXECTO DE
-
David Fidalgo
David Fidalgo
Artista e cineasta galego
Graduouse na Facultade de Belas Artes de Pontevedra, onde realizou o máster de Álbum Ilustrado e Animación.
David puido compaxinar as súas dúas paixóns, o cinema e a arte, ao converterse nun destacado realizador de animación a nivel nacional cun carácter e estilo moi persoais.
Coas súas curtametraxes de animación, Cartas a Superman (2016), Homomaquia (2019) e Sandwich Cat (2022), leva anos participando en diferentes festivais de cinema por todo o mundo, como South by Southwest, Buenos Aires Festival Internacional de Cinema Independiente, Festival Internacional de Cinema de Animación de Stuttgart ou Animac, entre outros, e acumulou varios recoñecementos, como o nomeamento aos Premios Goya 2020, o Premio do Público do Festival de Málaga ou o Mestre Mateo da Academia Galega do Audiovisual.
Tamén participou en varias exposicións, entre as que destacan “Cultivando incertezas”, no Centro Galego de Arte Contemporánea, en Santiago de Compostela (2021); “A costela de Adán”, na Galería Dupla, en Santiago de Compostela (2023); “JustMad”, na Galería Galería Modus Operandi, en Madrid (2023), e na Galería A Doce, en Boiro (2022); “Morra o conto”, na Galería Modus Operandi, en Madrid (2023); e “Imaxinaria”, na Fundación Abanca, en Santiago de Compostela (2022).