Proxecto expositivo
Máis alá De catro a catro
de Rosendo Cid
Do 18 de xaneiro ao 1 de marzo de 2024
Sala Rosalía de Castro, sede da Deputación en Vigo
Máis alá De catro a catro é un proxecto de intervención sobre o coñecido poemario de Manuel Antonio, De catro a catro (1928), co fin de extraer “novos poemas” dentro dos propios poemas orixinais nun sentido, ao mesmo tempo plástico e poético, e obxectualizar cada páxina dos dezanove poemas que forman esta obra de gran transcendencia na poesía galega; para iso adopta unha “actitude vangardista” influída polo manifesto que redactara en 1922 o propio Manuel Antonio, Máis alá. Deste xeito, esta é unha proposta plástica e de “escritura” diferente e suxestiva que trata de amosarlle ao público e de reivindicar non só a transcendencia da obra poética de Manuel Antonio, senón tamén un modo diferente de achegarse á súa escrita, sempre actual, e á arte e á literatura en xeral como construción mutua, nunha simbiose menos habitual pero posible e pertinente que nos leve cara a novas sensibilidades.
PROXECTO DE
-
Rosendo Cid
Rosendo Cid
Artista e escritor, traballa varios medios, coma a fotografía, a colaxe, a escultura ou o debuxo, nos que en ocasións inclúe textos que completan ou son parte fundamental destes. Prologou diversos catálogos de arte e comisariou exposicións; tamén expón regularmente desde o ano 2000. Das últimas mostras individuais podemos sinalar “Todo aquilo que sucede e con todo non é”, no Museo de Arte Contemporánea de Vigo (2021); “La duda es el único estado posible”, na galería Nordés (2018), ou “Fe de erratas”, na Fundación RAC (2017). Das colectivas sobresae a súa participación en “Afluentes 94: Os anos circulares”, unha selección das e dos artistas galegos máis salientables dos anos noventa. Dos seus últimos libros publicados cómpre destacar, entre outros, Poemario Geométrico (Estraperlo editora, 2021), 365 maneras de estar en un hotel (Tulipa Editora, 2021) e Los consejos no son un buen sitio para quedarse a vivir (Papeles Mínimos, 2018). Nos libros colectivos aparece en El cántaro a la fuente. Aforistas españoles para el siglo XXI (Apeadero de Aforistas e Thémata Editorial, 2020). Recibiu o primeiro premio CGAC de Investigación e Ensaio sobre Arte Contemporánea (2018) e o premio na convocatoria de comisariado para a Zona C, de Santiago de Compostela, coa mostra “Un cuarto propio”, con obras da artista Rosa Neutro (2017).