Nado en Amoeiro en 1944, Antón Pulido está asentado en Vigo desde hai máis de catro décadas, tempo suficiente para consolidarse como un dos pintores galegos de maior relevancia internacional. Solvente no seu percorrido expresionista nos anos sesenta e tamén nos períodos máis intimistas, o artista aposta na década dos 90 pola xeometría espacial. Pulido gozou sempre do aplauso do público e da crítica, e conta con importantes recoñecementos coma o Premio da Crítica de Galicia en Artes Plásticas ou o Premio Trasalba a toda unha vida dedicada á arte.

Nado en Forcarei (1940), José María Barreiro trasladouse a París en 1963 para estudar a obra de Picasso, Duffy e Matisse e, tras unha estancia en Vigo na que compartiu estudio con Urbano Lugrís, en 1969 trasladouse a Bos Aires convidado por Laxeiro, onde coñeceu a Luis Seoane. Tras máis de seis décadas de produción artística, Barreiro é hoxe un dos grandes referentes da pintura galega a nivel internacional. Expuxo en Madrid, Barcelona, a Arxentina, o Brasil, Portugal e os Estados Unidos.