A Xunta de Goberno da Deputación de Pontevedra aprobou hoxe unha nova achega para o Concello de Cambados de máis de 85.000 euros. Trátanse de recursos do Plan Extraordinario de Infraestruturas Deportivas, que permitirán ao concello substituír a cuberta do pavillón polideportivo do Pombal. “Con estes recursos - tal e como explicou o presidente provincial, Luis López- temos xa distribuído preto de 3,1 millóns de euros dos 4 aprobados no marco deste Plan. Seguimos así, como todas as semanas, axudando aos concellos da provincia a realizar unha transformación única nos seus equipamentos deportivos”.

Os 87.753 euros que recibe o Concello de Cambados da Deputación de Pontevedra permitirán rematar co mal estado actual no que se atopa a cuberta desta polideportivo, cunha cantidade importante de goteiras que dificultan o uso normal das instalacións polos veciños e usuarios do mesmo. Deste xeito, a actuación consiste na substitución total da cuberta actual, adecuando a estrutura metálica e instalando un panel acústico microperforado.

O concello completará a actuación no pavillón do Pombal coa colocación dun canlón, cumieira e coroacións. Ademais, cos recursos da institución provincial, instalarase unha cheminea de ventilación de aceiro galvanizado.