A Deputación de Pontevedra acaba de aprobar unha axuda ao Concello da Illa de Arousa, por valor de máis de 31.000 euros, coa que poderá facer fronte á mellora do alumeado do campo de fútbol Salvador Otero, situado no lugar de Testos. Estes recursos pertencen ao Plan Extraordinario de Infraestruturas Deportivas da Deputación, dotado de 4 millóns de euros para os 59 concellos da provincia cun número de habitantes inferior a 50.000.

Con esta nova inxección, o Concello da Illa de Arousa recibirá 31.344,32 € para impulsar nesta instalación deportiva novas medidas de medio ambiente e sostibilidade, tendo en conta ademais que este campo é onde teñen lugar os partidos da categoría preferente galega grupo sur e que é ademais a base do Céltiga Futbol Club desde fai máis de catro décadas. A achega da Deputación permitirá sufragar a substitución dos proxectores actuais por 24 novos exemplares con tecnoloxía LED.

O Plan Extraordinario de Infraestruturas Deportivas da Deputación mobilizou ata o momento máis de 2,8 dos 4 millóns de euros do orzamento total, con achegas para Agolada, Arbo, As Neves, Baiona, Barro, Campo Lameiro, Cangas, A Cañiza, Catoira, Cerdedo-Cotobade, Covelo, Crecente, Cuntis, Dozón, A Estrada, Fornelos de Montes, Gondomar, O Grove, A Illa de Arousa, Lalín, A Lama, Marín, Meaño, Meis, Mondariz, Mondariz-Balneario, Moraña, Nigrán, Oia, Pazos de Borbén, Poio, Ponte Caldelas, Pontecesures, Redondela, O Rosal, Rodeiro, Ribadumia, Salceda de Caselas, Salvaterra de Miño, Sanxenxo, Silleda, Soutomaior, Tui, Valga, Vila de Cruces, Vilaboa, Vilagarcía de Arousa e Vilanova de Arousa.