O presidente da Deputación de Pontevedra, Luis López, puxo a exposición “Cines de Pontevedra”, unha mostra “máxica” que inaugurou este luns e que se poderá visitar ata o vindeiro 30 de agosto no vestíbulo do Pazo provincial, como un exemplo de que para esta entidade “a cultura ocupa un lugar principal, que este inmoble é moito máis ca un edificio administrativo: é un lugar no que descubrir e coñecer a nosa provincia; e que estamos comprometidos coa divulgación da nosa cultura e as nosas tradicións a través desta exposición que visitará tamén distintos concellos da nosa provincia”, afirmou o mandatario provincial.

Acompañado polo vicepresidente Rafa Domínguez, o deputado de Cultura, Jorge Cubela; o comisario da exposición, Jesús Ángel Sánchez; e o fotógrafo Xosé Castro, o presidente da Deputación inaugurou unha mostra que supón a recuperación dos antigos cinemas, aqueles de sala única que se espallaron ao longo do século XX polas cidades, vilas e localidades da provincia e que, salvo contadas excepcións, pertencen xa ao pasado. Ademais dos restos materiais das vellas salas e dos documentos de arquivo, a exposición inclúe tamén un documental que recolle os testemuños e recordos de cincocentas persoas de distintos concellos da provincia que viviron o esplendor destas salas. “O mellor destas salas non eran as películas que se proxectaban neles. Era a actividade social que xiraba arredor destes nobres edificios. Auténticos centros da cultura que, pola globalización e a diversificación do ocio, acabaron caendo no abandono”, sinalou Luis López.

Con todo, o obxectivo do goberno provincial con esta exposición e outras accións pasa por conservar este legado cultural e histórico dos concellos. “Un abandono que desde a Deputación nos negamos a aceptar. Primeiro, reivindicando o papel das salas de cinema como dinamizadores da cultura a través desta exposición. E segundo, colaborando con proxectos estratéxicos coma a que asinamos o pasado venres para devolver á cidade de Vigo un emblema cultural como é o Cine Fraga”, ilustrou o presidente da Deputación.

“As salas de cinema do século pasado eran máxicas. Seguro que moitos aínda lembran a primeira película que viron ou gardan algunha fotografía ao carón do cartel da vosa película favorita”, asegurou López durante a presentación da exposición. “Estas salas de cinema mesmo se convertían en locais de baile e daban moita vida aos pobos”, engadiu o deputado de Cultura Jorge Cubela.

“Convido a todo o mundo a que se achegue ao Pazo provincial antes do 30 de agosto para viaxar á era do cinema con maiúsculas”, concluíu o presidente Luis López, quen agradeceu tamén as achegas dos usuarios do centro de día, que enriquecen coas súas lembranzas este percorrido pola historia do cinema na provincia de Pontevedra.

Galerias de imagenes