O presidente da Deputación de Pontevedra, Luis López, destacou o impulso que, ao longo de case un ano de xestión, está a realizar o goberno provincial a través de investimentos millonarios en obras e infraestruturas ao abeiro de programas como o +Provincia, o PON2030 ou o Plan Extraordinario de Infraestruturas Deportivas; o fomento do emprego mediante a contratación de 715 persoas en concellos de menos de 50.000 habitantes; o compromiso co mantemento das estradas provinciais ao mobilizar 60 millóns de euros para garantir o seu perfecto estado de conservación; ou a aposta polo deporte como complemento ideal para o turismo e a posta en marcha de iniciativas para consolidar as Rías Baixas como un destino turístico en crecemento e sustentable. Fíxoo no acto de clausura da segunda edición de Sinerxias, o Encontro de Organizacións e Entidades Empresariais de Galicia que tivo lugar este mércores en Vigo.

“O sector empresarial é ese motor económico que está a tirar da nosa provincia para levala ao seguinte nivel en eidos como o turismo, a innovación e a tecnoloxía, a automoción. a loxística e as enerxías renovables”, recoñeceu Luis López a importancia do tecido produtivo da provincia. Un colectivo que conta coa colaboración da Deputación, que “si recoñece a importancia dos empresarios, si apoia o emprendemento e si escoita a voz dos profesionais”, subliñou o titular do goberno provincial remarcando a necesidade de cooperación entre o sector público e o privado para construír unha provincia “forte, moderna e competitiva”.

O presidente da Deputación foi un dos encargados de pronunciar un dos tres discursos de clausura deste foro, xunto co presidente da Confederación de Empresarios de Galicia, Juan Manuel Vieites; e o conselleiro de Emprego, José González. Un encontro no que representantes dos colectivos empresariais máis importantes de Galicia analizaron, en conferencias e mesas de debate, as circunstancias actuais que afectan ao tecido económico da comunidade.

Neste sentido, Luis López subliñou o compromiso municipalista da Deputación de Pontevedra ao impulsar investimentos en todos os concellos da provincia, “desde o máis modesto, ata o máis grande, Vigo”. Unha aposta da Deputación pola cidade máis importante de Galicia que se traduce na sinatura do convenio para construirá a grada de Gol do estadio de Balaídos, que se  asinará este venres e supón un investimento de 13,5 millóns de euros; a colaboración coa Xunta para reabrir o Cine Fraga, ou a cooperación para conseguir que Vigo sexa sede do mundial de fútbol que se celebrará en España, Portugal e Marrocos no 2030. “Se o motor económico vigués funciona, Pontevedra, Galicia e España aceleran”, ilustrou López a importancia de Vigo para a economía de toda a provincia.

“A provincia tende pontes, pero nunca deixará de recoñecer a quen as constrúen: o sector empresarial”, rematou o presidente da Deputación de Pontevedra

Galerias de imaxes